Գիտաժողով ԱՄՆ-ում. «Ցիտոկիններ և բորբոքումներ»

ԱՄՆ-ի նշանավոր իմունաբանների մասնակցությամբ Սան Դիեգո քաղաքում 2010թ. հունվարին «Ցիտոկիններ և բորբոքումներ» նշանաբանի տակ տեղի ունեցած համաամերիկյան գիտաժողովին հրավիրված էր և ընդարձակ զեկուցումով հանդես եկավ ՀՀ ԳԱԱ և ՀՀ ԲԳԱ ակադեմիկոս, պրոֆեսոր Արմեն Գալոյանը: 

Ի թիվս գիտական նորույթներ ներկայացնող տարբեր զեկուցումների, առանձնահատուկ ուշադրության արժանացավ գիտաժողովի ղեկավար, պրոֆեսոր Ջ.Օպենհեյմի ծրագրային դասախոսությունը, որը նվիրված էր, այսպես կոչված`«ալարմիններին»` սպիտակուցներին, որոնք առաջանում են լեյկոցիտներում, կերատոցիտներում և էպիթելային բջիջներում: Զեկուցողը կարևորեց այն, որ դրանք արագ գոյանում են նաև բազմաթիվ ախտածին ազդակների ազդեցության ներքո, որպես օրգանիզմը տարբեր հիվանդություններից պաշտպանող իմունախթանիչներ:

Ակադեմիկոս Գալոյանի զեկուցումը հիմնականում նվիրված էր տարբեր հիվանդությունների ախտաբանության մեջ ցիտոկինների ունեցած դերին: Նրա և աշխատակիցների կողմից լաբորատոր պայմաններում հայտնաբերած իմունային ցիտոկինների քիմիական կառուցվածքի բացահայտումը հնարավորություն է տվել պարզելու դրանց կարևորությունը իմունային, վարակական, նյարդային և ուռուցքային հիվանդությունների բուժման գործում: Այս աշխատանքների արդյունքում հայտնաբերված են ցիտոկիններ, որոնք սինթեզվում են կենտրոնական նյարդային համակարգում` ուղեղում, որտեղ դրանք իմունաթերապևտիկ հզոր միջոց են: Ըստ ակադեմիկոս Գալոյանի, սթրեսների ժամանակ օրգանիզմի պաշտպանական մեխանիզմներն ուսումնասիրելիս դրանց բուն էությունը բացահայտելու համար անհրաժեշտ է կենտրոնական և ծայրամասային նյարդային համակարգերի համակցված հետազոտություններ կատարել: 

Գիտահետազոտական աշխատանքներն ավելի արդյունավետ դարձնելու նպատակով որոշվեց ակտիվացնել Սան Դիեգոյի քաղցկեղի ինստիտուտի իմունային բաժնի և ՀՀ ԳԱԱ կենսաքիմիայի ինստիտուտի նեյրոհորմոնների բաժնի համատեղ գործունեությունը: 

ԱՄՆ-ի գիտական հասարակությունը մեկ անգամ ևս ծանոթացավ Հայաստանում կատարվող գիտական հետազոտություններին` նեյրոկենսաբանության նոր ուղղություններին: Բացի այդ, Life-Time Pharmaceuticals Inc. ընկերության նախագահ Դր. Ֆ.Տաուբի և պրոֆ. Ա.Գալոյանի միջև տեղի ունեցան լուրջ քննարկումներ` վերջինիս ու աշխատակիցների կողմից ստեղծված նոր պատրաստուկների վերաբերյալ, որոնք խիստ կարևոր են արյան և վարակական ծանր հիվանդությունների (հատկապես սիբիրյան խոցի) բուժման համար:

Վերջերս լրացավ տաղանդավոր գիտնական, ՀՀ ԳԱԱ, ԲԳԱ և գիտությունների միջազգային ակադեմիաների ակադեմիկոս, կենսաբանական գիտությունների դոկտոր, պրոֆեսոր, արտասահմանյան մի շարք երկրների գիտությունների ակադեմիաների պատվավոր անդամ Արմեն Անուշավանի Գալոյանի ծննդյան 80-ամյակը:

 Հիրավի, ՀՀ բժշկագիտությունն իրավունք ունի պարծենալու համաշխարհային ճանաչում ստացած և դեռ ակտիվ գործունեության եռանդով տոգորված մարդ, քաղաքացի, նշանավոր գիտնական, պրոֆեսոր Արմեն Գալոյանով, համաշխարհային կենսաքիմիայի ասպարեզում նրա կատարած խոշոր ներդրումներով:

«Առողջապահություն» հանդեսի խմբագրությունը սրտանց շնորհավորում է նշանավոր գիտնականին 80-ամյա հոբելյանի կապակցությամբ, ցանկանում նրան քաջառողջություն, նոր հաջողություններ ժամանակակից բժշկագիտության և մասնավորապես` կենսաքիմիայի զարգացման բնագավառում:

Հարցեր, պատասխաններ, մեկնաբանություններ